Assamese poem "Podhumor Abhijan (পদুমৰ অভিযান)" By Amulya Barua(অমূল্য বৰুৱা ) || Assamese Medium
 |
| Amulya Barua |
Podumor Abhijan Assamese Poem By Amulya Barua
অসমীয়া কবিতা পদুমৰ অভিযান কবি অমূল্য বৰুৱা
পদুমৰ অভিযান
অসুখীয়া মনে মােৰ
অসুখৰে ভাৰ বই
অসুখৰ সাধনাকে সাধি
নিজৰ অসুখ বুলি
পৰকো অসুখী কৰি
দুঃখ দিয়ে জীৱন অৱধি ॥
অসুখৰে খেলা খেলি
জীৱনৰ আধা বেলি
মিছাকৈয়ে দিলাে উটুৱাই;
সুখৰ বসুধা খনি
দুখৰ আন্ধাৰে ঢাকি
আন্ধাৰতে গলাে ভটীয়াই।
বহুদূৰ বাট বুলি
ভাগৰৰ বেমেজালি
বেদনাৰে বােজা বান্ধি লই;
নিৰাশ দুপৰ নিশা
পালক পালিকা তৰি
নাওখনি মেলি দিলাে মই।
লক্ষ্যহীন তৰণীৰ
গতিহীন নিৰৱতা
ভেদকৰি গলোঁ বহুদূৰ
নিজান নিমাত হায়
জীৱন সাগৰ পাৰ
এতিয়াও পৰা নাই ওৰ ?
ধীৰে ধীৰে যাব মােৰ
বাধাহীন নাও খনি
দূৰ আৰু অতি দূৰলৈ;
ছিগি গ'ল আলজৰী
ফুটি য’ক নাও তলি
তথাপিও ভটীয়াম মই।
যেতিয়া শিকিম মই
ভাললগা কথাবােৰ
বতাহতে বৰষিম মই,
ভয়লগা সাগৰৰ
বিভীষিকা হৰষত
উটুৱাম কাটি শত ঢ’উ।
তেতিয়া কৰিম মই।
দৰদী প্রিয়াক মােৰ
পৰাণৰ প্রিয়া বিনন্দীয়া
হাত পাতি খুজি লম
তথাপিও যত ফুল
মৰমৰ মালা গাঁথি দিয়া ।
- অমূল্য বৰুৱা
